Indian Citizenship; ഇന്ത്യയിലെ പൗരത്വ നിയമങ്ങളെക്കുറിച്ച് പലപ്പോഴും വലിയ ആശയക്കുഴപ്പങ്ങൾ നിലനിൽക്കാറുണ്ട്. സാധാരണയായി നാം തിരിച്ചറിയൽ രേഖകളായി ഉപയോഗിക്കുന്ന പല രേഖകളും പൗരത്വം തെളിയിക്കാനുള്ള ഔദ്യോഗിക രേഖകളാണെന്ന് പലരും തെറ്റായി ധരിക്കുന്നു. എന്നാൽ ഇന്ത്യൻ നിയമപ്രകാരം പാസ്പോർട്ട്, ആധാർ, വോട്ടർ ഐഡി, പാൻ കാർഡ് എന്നിവയൊന്നും പൗരത്വം തെളിയിക്കാനുള്ള അന്തിമ രേഖകളല്ല.
പാസ്പോർട്ട് എന്നത് കേവലം ഒരു യാത്രാ രേഖ മാത്രമാണെന്നും അത് പൗരത്വത്തിനുള്ള തെളിവല്ലെന്നും വിദേശകാര്യ മന്ത്രാലയം അടുത്തിടെ വ്യക്തമാക്കിയതോടെയാണ് ഈ വിഷയം വീണ്ടും ചർച്ചയായത്.
എന്തുകൊണ്ടാണ് ഈ ചർച്ച പ്രസക്തമാകുന്നത്?
ഇന്ത്യയിൽ എല്ലാ പൗരന്മാർക്കുമായി ഒരൊറ്റ ‘സിറ്റിസൺഷിപ്പ് കാർഡ്’ നിലവിലില്ല. 1955-ലെ പൗരത്വ നിയമപ്രകാരമുള്ള മാനദണ്ഡങ്ങൾ, ചരിത്രപരമായ രേഖകൾ, ജനന വിവരങ്ങൾ എന്നിവയുടെ അടിസ്ഥാനത്തിലാണ് ഒരാൾ ഇന്ത്യൻ പൗരനാണോ എന്ന് തീരുമാനിക്കുന്നത്. അതുകൊണ്ട് തന്നെ നിങ്ങളുടെ കൈവശമുള്ള തിരിച്ചറിയൽ രേഖകൾ താമസസ്ഥലം തെളിയിക്കാൻ സഹായിക്കുമെങ്കിലും പൗരത്വം നിയമപരമായി സ്ഥാപിക്കാൻ മറ്റ് രേഖകൾ ആവശ്യമായി വരും.
തിരിച്ചറിയൽ രേഖകൾ പൗരത്വ രേഖകളല്ലാത്തത് എന്തുകൊണ്ട്?
- പാസ്പോർട്ട്
പാസ്പോർട്ട് നൽകുന്നത് കർശനമായ പരിശോധനകൾക്ക് ശേഷമാണെങ്കിലും, പാസ്പോർട്ട് നിയമപ്രകാരം അപൂർവ്വ സാഹചര്യങ്ങളിൽ പൊതുതാൽപ്പര്യാർത്ഥം ഇത് പൗരത്വം ഇല്ലാത്തവർക്കും നൽകാൻ വ്യവസ്ഥയുണ്ട്. ഇതൊരു യാത്രാ രേഖയാണ്. ഒരാളുടെ പൗരത്വം ചോദ്യം ചെയ്യപ്പെട്ടാൽ പാസ്പോർട്ട് റദ്ദാക്കാം.
- ആധാർ കാർഡ്
ഇത് ഇന്ത്യയിൽ താമസിക്കുന്നവർക്ക് (Residents) നൽകുന്ന തിരിച്ചറിയൽ രേഖയാണ്, പൗരന്മാർക്ക് മാത്രമുള്ളതല്ല. ആധാർ പൗരത്വ രേഖയല്ലെന്ന് സുപ്രീം കോടതി വ്യക്തമാക്കിയിട്ടുണ്ട്. ഇന്ത്യയിൽ താമസിക്കുന്ന വിദേശികൾക്കും ആധാർ എടുക്കാം.
- പാൻ കാർഡ്
ഇത് നികുതി സംബന്ധമായ ആവശ്യങ്ങൾക്കുള്ള രേഖയാണ്. ഇന്ത്യയിൽ നിക്ഷേപമോ വരുമാനമോ ഉള്ള വിദേശികൾക്കും പാൻ കാർഡ് ലഭിക്കും. ഇതിന് പൗരത്വവുമായി ബന്ധമില്ല.
- വോട്ടർ ഐഡി
വോട്ട് ചെയ്യാനുള്ള അവകാശം നൽകുന്നുണ്ടെങ്കിലും, വോട്ടർ പട്ടികയിൽ പേരുള്ളതുകൊണ്ട് മാത്രം ഒരാൾ പൗരനാകണമെന്നില്ലെന്ന് തിരഞ്ഞെടുപ്പ് കമ്മീഷൻ തന്നെ വ്യക്തമാക്കിയിട്ടുണ്ട്.
യഥാർത്ഥത്തിൽ പൗരത്വം തെളിയിക്കുന്നത് എങ്ങനെ?
ഇന്ത്യയിൽ പൗരത്വം പ്രധാനമായും താഴെ പറയുന്ന രേഖകളിലൂടെയും സാഹചര്യങ്ങളിലൂടെയുമാണ് ഉറപ്പിക്കുന്നത്:
നിയമപരമായ നിബന്ധനകൾ പാലിക്കുന്ന ജനന സർട്ടിഫിക്കറ്റുകൾ.
രജിസ്ട്രേഷൻ വഴിയോ നാച്ചുറലൈസേഷൻ വഴിയോ ലഭിച്ച പൗരത്വ സർട്ടിഫിക്കറ്റുകൾ.
ഇന്ത്യൻ പൗരത്വം ലഭിക്കുന്ന അഞ്ച് വഴികൾ
ജനനം വഴി : ഇന്ത്യയിൽ ജനിച്ചവർക്ക് (നിയമത്തിലെ നിബന്ധനകൾക്ക് വിധേയമായി).
വംശപരമ്പര വഴി: വിദേശത്ത് ജനിച്ചവർക്ക് ഇന്ത്യൻ പാരമ്പര്യം ഉണ്ടെങ്കിൽ.
രജിസ്ട്രേഷൻ വഴി: നിശ്ചിത മാനദണ്ഡങ്ങൾ പാലിക്കുന്നവർക്ക് അപേക്ഷിക്കാം.
നാച്ചുറലൈസേഷൻ വഴി : ദീർഘകാലം ഇന്ത്യയിൽ താമസിക്കുന്ന വിദേശികൾക്ക്.
ഭൂപ്രദേശം കൂട്ടിച്ചേർക്കൽ വഴി : ഏതെങ്കിലും പുതിയ പ്രദേശം ഇന്ത്യയുടെ ഭാഗമാകുമ്പോൾ അവിടുത്തെ താമസക്കാർക്ക്.
വിവിധ കോടതി വിധികളിലൂടെ പൗരത്വം കേവലം രേഖകൾ കൊണ്ട് മാത്രം തെളിയിക്കാനാവില്ലെന്ന് വ്യക്തമാക്കിയിട്ടുണ്ട്. സർബാനന്ദ സോനോവാൾ കേസിലുൾപ്പെടെ (2005), പൗരത്വം തെളിയിക്കേണ്ട ബാധ്യത അതത് വ്യക്തിക്കാണെന്ന് കോടതി നിരീക്ഷിച്ചിട്ടുണ്ട്. പാൻ കാർഡും വോട്ടർ ഐഡിയും പൗരത്വത്തിന് അന്തിമ തെളിവല്ലെന്നും കോടതികൾ ആവർത്തിച്ചിട്ടുണ്ട്. പാസ്പോർട്ട് ഒരാൾ ഇന്ത്യൻ പൗരനാണെന്നുള്ളതിന്റെ ശക്തമായ സൂചനയാണെങ്കിലും നിയമപരമായ തർക്കങ്ങൾ വരുമ്പോൾ അത് അന്തിമ രേഖയായി കണക്കാക്കില്ല. ഇന്ത്യയിൽ ജനിച്ച വർഷം, മാതാപിതാക്കളുടെ പൗരത്വം എന്നിവയുമായി ബന്ധപ്പെട്ട രേഖകളാണ് പൗരത്വം ഉറപ്പിക്കാൻ അത്യാവശ്യം. പൗരത്വം രജിസ്ട്രേഷൻ വഴിയോ നാച്ചുറലൈസേഷൻ വഴിയോ നേടിയവർക്ക് മാത്രമേ നിലവിൽ പൗരത്വ സർട്ടിഫിക്കറ്റുകൾ ഇന്ത്യയിൽ നൽകുന്നുള്ളൂ. സാധാരണ പൗരന്മാർക്ക് ജനന രേഖകളാണ് പ്രധാന ആശ്രയം.
