Rainbow Capital Of The World; ആകാശത്ത് ഒരു മഴവിൽ വിരിയുന്നത് കാണുന്നത് തന്നെ നമുക്ക് ഏറെ കൗതുകമുള്ള കാര്യമാണ്. എന്നാൽ ഒരേസമയം രണ്ട് മഴവില്ലുകൾ, അതും നിത്യേന കാണാൻ സാധിക്കുന്ന ഒരു സ്ഥലത്തെക്കുറിച്ച് ആലോചിച്ചു നോക്കിയിട്ടുണ്ടോ? അമേരിക്കയിലെ ദ്വീപ് സമൂഹമായ ഹവായിയെയാണ് (Hawaii) ലോകത്തിന്റെ ‘മഴവിൽ തലസ്ഥാനം’ (Rainbow Capital of the World) എന്ന് വിളിക്കുന്നത്. ഹവായ് സർവകലാശാലയിലെ അറ്റ്മോസ്ഫെറിക് സയൻസസ് പ്രൊഫസറായ സ്റ്റീവൻ ബുസിംഗർ ആണ് ഹവായിക്ക് ഈ വിശേഷണം നൽകിയത്. ഹവായിയിലെ ശാസ്ത്രീയവും ഭൂമിശാസ്ത്രപരവുമായ പ്രത്യേകതകളാണ് ഈ പ്രതിഭാസത്തിന് പിന്നിൽ.

എന്തുകൊണ്ട് ഹവായിയിൽ ഇത്രയധികം മഴവില്ലുകൾ?

പസഫിക് സമുദ്രത്തിൽ നിന്നുള്ള വായുപ്രവാഹവും ഹവായിയിലെ മൗന ലോവ, ഹാലേകാല തുടങ്ങിയ ഉയർന്ന മലനിരകളും ചേരുമ്പോഴാണ് ഇവിടെ മഴമേഘങ്ങൾ രൂപപ്പെടുന്നത്. ഈ മേഘങ്ങളിൽ നിന്നുള്ള ചെറിയ മഴത്തുള്ളികളിലേക്ക് സൂര്യപ്രകാശം പതിക്കുമ്പോൾ അവ പ്രിസം പോലെ പ്രവർത്തിക്കുമ്പോൾ ആകാശത്ത് അതിമനോഹരമായ മഴവില്ലുകൾ വിരിയും. ഹവായിയിലെ വായു മറ്റ് വൻനഗരങ്ങളെ അപേക്ഷിച്ച് തികച്ചും ശുദ്ധമായതിനാൽ ഇവിടെ ഉണ്ടാകുന്ന മഴവില്ലുകൾക്ക് നിറം വളരെ കൂടുതലായിരിക്കും. നവംബർ മുതൽ മാർച്ച് വരെയുള്ള മാസങ്ങളിലാണ് ഇവിടെ ഏറ്റവും കൂടുതൽ മഴവില്ലുകൾ കാണാൻ സാധിക്കുന്നത്. ഹവായിയൻ സംസ്കാരത്തിലും ഭാഷയിലും മഴവില്ലുകൾക്ക് വലിയ സ്ഥാനമുണ്ട്. ഭൂമിയോട് ചേർന്നുനിൽക്കുന്ന മഴവില്ലുകൾ (uakoko), രാത്രിയിൽ ചന്ദ്രപ്രകാശത്തിൽ ഉണ്ടാകുന്ന മഴവില്ലുകൾ (ആനുവേനുവേ കൗ പോ) എന്നിങ്ങനെ വ്യത്യസ്ത തരം മഴവില്ലുകൾക്കായി നിരവധി വാക്കുകൾ അവരുടെ ഭാഷയിലുണ്ട്. രാത്രിയിൽ ചന്ദ്രപ്രകാശം മൂലം ഉണ്ടാകുന്ന ഇത്തരം ‘മൂൺബോകൾ’ (Moonbows) ഹവായിയിലെ വെയ്മിയ ഫാൾസിൽ വെച്ച് പൂർണ്ണചന്ദ്രനുള്ള ദിവസങ്ങളിൽ കാണാൻ സാധിക്കും.

മഴവില്ല് കണ്ടെത്താൻ ഒരു മൊബൈൽ ആപ്പ്
ഹവായിയിൽ മഴവില്ലുകൾ കണ്ടെത്താൻ മാത്രമായി ‘റെയിൻബോചേസ്’ (RainbowChase) എന്ന പേരിൽ ഒരു മൊബൈൽ ആപ്ലിക്കേഷനും നിലവിലുണ്ട്. പ്രൊഫസർ സ്റ്റീവൻ ബുസിംഗറും പോൾ സിന്നും ചേർന്ന് വികസിപ്പിച്ച ഈ ആപ്പ്, തത്സമയ കാലാവസ്ഥാ വിവരങ്ങളും മേഘങ്ങളുടെ പാറ്റേണും പരിശോധിച്ച് അടുത്ത മഴവില്ല് എവിടെ, എപ്പോൾ ഉണ്ടാകുമെന്ന് പ്രവചിക്കുന്നു.

സഞ്ചാരികൾക്കായി ചില പ്രധാന വിവരങ്ങൾ
ഇന്ത്യയിൽ നിന്ന് ഹവായിലേക്ക് നേരിട്ട് വിമാന സർവീസുകൾ ഇല്ല. ടോക്കിയോ, സോൾ അല്ലെങ്കിൽ ലോസ് ആഞ്ചലസ് വഴി കണക്റ്റിംഗ് ഫ്ലൈറ്റുകൾ ലഭ്യമാണ്. യാത്ര തിരിക്കും മുൻപ് യുഎസ് വിസ (US Visa) ഉറപ്പാക്കേണ്ടതുണ്ട്. ഒഹാവു (Oahu), മൗയി (Maui), കവായ് (Kauai) തുടങ്ങിയ ദ്വീപുകളാണ് സന്ദർശിക്കാൻ ഏറ്റവും അനുയോജ്യം. ഹോണോലുലു പോലുള്ള നഗരങ്ങളിൽ ഇന്ത്യൻ കമ്മ്യൂണിറ്റികൾ ഉള്ളതിനാൽ സസ്യഭുക്കുകളായ ഇന്ത്യൻ സഞ്ചാരികൾക്ക് ഭക്ഷണ കാര്യത്തിലും ബുദ്ധിമുട്ടുണ്ടാകില്ല. നിങ്ങളുടെ അടുത്ത യാത്രാ ലിസ്റ്റിലേക്ക് തീർച്ചയായും ഉൾപ്പെടുത്താവുന്ന ഒരു മാന്ത്രിക ലോകമാണ് ഹവായ്.