Insurance Premiums; കാർ ഉടമകൾക്ക് ഓരോ വർഷവും ഇൻഷുറൻസ് പുതുക്കുന്നത് വലിയൊരു സാമ്പത്തിക ബാധ്യതയായി തോന്നാറുണ്ട്. എന്നാൽ കൃത്യമായ പ്ലാനിംഗും സുരക്ഷിതമായ ഡ്രൈവിംഗും ഉണ്ടെങ്കിൽ ഇൻഷുറൻസ് പ്രീമിയം തുകയിൽ പകുതിയോളം ലാഭിക്കാൻ സാധിക്കുമെന്ന് പലർക്കും അറിയില്ല. ഇൻഷുറൻസ് കമ്പനികൾ സുരക്ഷിതമായി വണ്ടിയോടിക്കുന്നവർക്ക് നൽകുന്ന ‘നോ ക്ലെയിം ബോണസ്’ (NCB) എന്ന ആനുകൂല്യത്തെക്കുറിച്ചാണ് പറയുന്നത്.ഒരു പോളിസി വർഷത്തിൽ ഇൻഷുറൻസ് ക്ലെയിം ഒന്നും ചെയ്തിട്ടില്ലാത്ത വാഹന ഉടമകൾക്ക് അടുത്ത വർഷത്തെ പ്രീമിയത്തിൽ നൽകുന്ന പ്രതിഫലമാണിത്. അപകടങ്ങൾ വരുത്താത്ത ഡ്രൈവർമാർ ഇൻഷുറൻസ് കമ്പനിയെ സംബന്ധിച്ചിടത്തോളം ലാഭമുണ്ടാക്കുന്നവരാണ്. ഈ ലാഭത്തിന്റെ ഒരു വിഹിതം ഡിസ്കൗണ്ട് രൂപത്തിൽ കമ്പനി ഉപഭോക്താവിന് തിരികെ നൽകുന്നു. ഇൻഷുറൻസ് തുകയിലെ ‘ഓൺ ഡാമേജ്’ (Own Damage) ഭാഗത്തിനാണ് ഈ ഇളവ് ലഭിക്കുന്നത്.
ഈ ആനുകൂല്യത്തിന്റെ ഏറ്റവും വലിയ പ്രത്യേകത ഇത് വർഷംതോറും വർദ്ധിച്ചുകൊണ്ടിരിക്കും എന്നതാണ്. ആദ്യത്തെ ക്ലെയിം ഇല്ലാത്ത വർഷം 20 ശതമാനം ഇളവ് ലഭിക്കും. ഇത് തുടർച്ചയായ രണ്ടാം വർഷം 25 ശതമാനമായും മൂന്നാം വർഷം 35 ശതമാനമായും വർദ്ധിക്കും. നാലാം വർഷം 45 ശതമാനവും, അഞ്ചാം വർഷം എത്തുമ്പോൾ പ്രീമിയം തുകയുടെ 50 ശതമാനവും ഇളവ് ലഭിക്കും. അതായത് നിങ്ങളുടെ ഇൻഷുറൻസ് തുക പകുതിയായി കുറയും. മറ്റൊരു പ്രധാന കാര്യം, ഈ ആനുകൂല്യം വാഹനത്തിനല്ല, മറിച്ച് ഉടമയ്ക്കാണ് ലഭിക്കുന്നത് എന്നതാണ്. നിങ്ങൾ പഴയ കാർ വിറ്റ് പുതിയൊരെണ്ണം വാങ്ങുമ്പോൾ, പഴയ കാറിലൂടെ നേടിയെടുത്ത ഈ 50 ശതമാനം ഇളവ് പുതിയ കാറിലേക്ക് മാറ്റാൻ സാധിക്കും. പുതിയ കാറിന്റെ ഇൻഷുറൻസ് തുക കൂടുതലായതിനാൽ ഇത് വലിയൊരു തുക ലാഭിക്കാൻ സഹായിക്കും. ഇതിനായി പഴയ ഇൻഷുറൻസ് കമ്പനിയിൽ നിന്നും ‘NCB സർട്ടിഫിക്കറ്റ്’ വാങ്ങിയാൽ മതിയാകും.
ചെറിയ തകരാറുകൾക്കായി ഇൻഷുറൻസ് ക്ലെയിം ചെയ്യുന്നത് പലപ്പോഴും വലിയ നഷ്ടമുണ്ടാക്കും. ഉദാഹരണത്തിന്, 2,000 രൂപയുടെ അറ്റകുറ്റപ്പണിക്ക് വേണ്ടി ഇൻഷുറൻസ് ക്ലെയിം ചെയ്താൽ, അടുത്ത വർഷം ലഭിക്കേണ്ട വലിയൊരു ഡിസ്കൗണ്ട് നിങ്ങൾക്ക് നഷ്ടമാകും. അറ്റകുറ്റപ്പണിക്ക് ചെലവാകുന്ന തുകയേക്കാൾ കൂടുതൽ നിങ്ങൾക്ക് ഡിസ്കൗണ്ട് വഴി ലാഭിക്കാൻ കഴിയുമെങ്കിൽ, സ്വന്തം കയ്യിൽ നിന്ന് പണം നൽകി വണ്ടി നന്നാക്കുന്നതാണ് ബുദ്ധി. ഇൻഷുറൻസ് കാലാവധി കഴിഞ്ഞ് 90 ദിവസത്തിനുള്ളിൽ പുതുക്കാൻ പ്രത്യേകം ശ്രദ്ധിക്കണം, അല്ലാത്തപക്ഷം നിങ്ങൾ വർഷങ്ങളായി സമ്പാദിച്ച ഈ ആനുകൂല്യം റദ്ദാക്കപ്പെടും. ‘എൻ.സി.ബി പ്രൊട്ടക്ഷൻ’ എന്ന അഡീഷണൽ കവർ എടുക്കുന്നത് വഴി ഒരു ക്ലെയിം നടത്തിയാലും നിങ്ങളുടെ ഈ ഇളവ് നഷ്ടപ്പെടാതെ സംരക്ഷിക്കാനും സാധിക്കും.
