Qatar India investment; ഇന്ത്യൻ വിപണിയിലെ സുവർണ്ണാവസരങ്ങൾ ഉപയോഗപ്പെടുത്താൻ ഖത്തരി നിക്ഷേപകരെ സ്വാ​ഗതം ചെയ്ത് കേന്ദ്ര ധനമന്ത്രി നിർമ്മല സീതാരാമൻ. ഇരുരാജ്യങ്ങളും തമ്മിലുള്ള സാമ്പത്തിക-വ്യാപാര ബന്ധങ്ങൾ കൂടുതൽ ദൃഢമാക്കുന്നതിന്റെ ഭാഗമായി, ഉഭയകക്ഷി നിക്ഷേപ ഉടമ്പടി, സ്വതന്ത്ര വ്യാപാര കരാർ എന്നിവയുമായി ബന്ധപ്പെട്ട ചർച്ചകൾ വേഗത്തിലാക്കാൻ ഇന്ത്യയും ഖത്തറും ധാരണയിലെത്തി. ഇന്ത്യയിൽ 10 ബില്യൺ ഡോളറിന്റെ (ഏകദേശം ₹96,700 കോടി) നിക്ഷേപം നടത്താനുള്ള ഖത്തറിന്റെ പ്രതിബദ്ധതയും, ഇതിന്റെ ഭാഗമായി ഖത്തർ ഇൻവെസ്റ്റ്‌മെന്റ് അതോറിറ്റിയുടെ ഓഫീസ് ഇന്ത്യയിൽ ആരംഭിക്കാനുള്ള തീരുമാനവും ഇരുരാജ്യങ്ങളുടെയും സഹകരണത്തിന് പുതിയ വേഗത നൽകിയിട്ടുണ്ട്.
പ്രമുഖ ജാപ്പനീസ് റേറ്റിങ് ഏജൻസി ഇന്ത്യയുടെ ദീർഘകാല ക്രെഡിറ്റ് റേറ്റിങ് BBB+ൽ നിന്ന് A− ആയി ഉയർത്തിയത് ധനമന്ത്രി എടുത്തുപറഞ്ഞു. ഇന്ത്യയുടെ കരുത്തുറ്റ സാമ്പത്തിക വളർച്ചയും നിക്ഷേപക സൗഹൃദ അന്തരീക്ഷവും വിദേശ നിക്ഷേപകർക്ക് അനന്തസാധ്യതകളാണ് തുറന്നുനൽകുന്നത്. 2026 സാമ്പത്തിക വർഷത്തിൽ 94.53 ബില്യൺ ഡോളറിന്റെ നേരിട്ടുള്ള വിദേശ നിക്ഷേപമാണ് (FDI) ഇന്ത്യ നേടിയത്. കഴിഞ്ഞ 15 വർഷത്തിനിടയിലെ ഏറ്റവും ഉയർന്ന കണക്കാണിത്. വ്യത്യസ്ത മേഖലകളിലെ നിക്ഷേപ സാധ്യതകൾ പരമാവധി പ്രയോജനപ്പെടുത്താൻ ഖത്തരി നിക്ഷേപകർ മുന്നോട്ടുവരണമെന്ന് നിർമല സീതാരാമൻ ആവശ്യപ്പെട്ടു. വിദേശ നിക്ഷേപകർക്ക് ആവശ്യമായ എല്ലാ പിന്തുണയും സൗകര്യങ്ങളും ഒരുക്കാൻ ഇന്ത്യ സജ്ജമാണെന്നും അവർ വ്യക്തമാക്കി. ന്യൂഡൽഹിയിൽ നടന്ന ഉന്നതതല ചർച്ചകളിലാണ് ഉഭയകക്ഷി നിക്ഷേപ ഉടമ്പടികൾ അന്തിമമാക്കാനും സ്വതന്ത്ര വ്യാപാര കരാർ ചർച്ചകൾ വേഗത്തിലാക്കാനും തീരുമാനമായത്. ഈ തന്ത്രപരമായ നീക്കങ്ങൾ ഇന്ത്യ-ഖത്തർ വ്യാപാര ബന്ധങ്ങൾക്ക് ചരിത്രപരമായ മുതൽക്കൂട്ടാകുമെന്നാണ് വിലയിരുത്തപ്പെടുന്നത്.