Qatar Ministry food safety warning; ഫോൺ വഴി വ്യക്തികൾ വിൽക്കുന്നതോ വിപണനം ചെയ്യുന്നതോ ആയ ഭക്ഷ്യവസ്തുക്കൾ വാങ്ങുന്നതിനെതിരെ പൊതുജനങ്ങൾക്ക് മുന്നറിയിപ്പുമായി ഖത്തർ പൊതുജനാരോഗ്യ മന്ത്രാലയം (MoPH). ഇത്തരം ഉൽപ്പന്നങ്ങൾ കർശനമായ ഔദ്യോഗിക പരിശോധനകൾക്കോ ഗുണനിലവാര നിയന്ത്രണങ്ങൾക്കോ വിധേയമാകില്ലെന്നും, ഇത് ഭക്ഷ്യസുരക്ഷയ്ക്കും പൊതുജനാരോഗ്യത്തിനും വലിയ ഭീഷണിയാണെന്നും മന്ത്രാലയം വ്യക്തമാക്കി. ഭക്ഷ്യവസ്തുക്കൾ വാങ്ങുമ്പോൾ ലൈസൻസുള്ള അംഗീകൃത കടകളെയും സ്ഥാപനങ്ങളെയും മാത്രം ആശ്രയിക്കണമെന്ന് അധികൃതർ നിർദ്ദേശിച്ചു. ഭക്ഷണത്തിന്റെ ഗുണനിലവാരവും സുരക്ഷയും ഉറപ്പുവരുത്താനും കുടുംബാംഗങ്ങളുടെ ആരോഗ്യം സംരക്ഷിക്കാനും വിശ്വസനീയമായ ഉറവിടങ്ങളിൽനിന്ന് മാത്രം സാധനങ്ങൾ വാങ്ങേണ്ടത് അത്യാവശ്യമാണ്. വേനൽക്കാലത്ത് ഭക്ഷ്യസുരക്ഷ ഉറപ്പാക്കുന്നതിനായി മന്ത്രാലയം നടത്തുന്ന ബോധവൽക്കരണ കാമ്പയിന്റെ ഭാഗമായാണ് ഈ മുന്നറിയിപ്പ്. ഭക്ഷണം വാങ്ങുന്നത് മുതൽ സൂക്ഷിക്കുന്നതും പാകം ചെയ്ത് ഉപയോഗിക്കുന്നതു വരെയുള്ള ഘട്ടങ്ങളിൽ ജനങ്ങൾ അതീവ ജാഗ്രത പാലിക്കണമെന്ന് അധികൃതർ ഓർമ്മിപ്പിച്ചു.

ഭക്ഷണം കഴിക്കുമ്പോൾ ശ്രദ്ധിക്കേണ്ട പ്രധാന കാര്യങ്ങൾ

• റെസ്റ്റോറന്റുകൾ തിരഞ്ഞെടുക്കുമ്പോൾ ശുചിത്വത്തിന് മുൻഗണന നൽകുക.

• ഭക്ഷണം വിളമ്പുന്ന സ്ഥലങ്ങളും പാത്രങ്ങളും പൂർണ്ണമായും വൃത്തിയുള്ളതാണെന്ന് ഉറപ്പുവരുത്തുക.

• ഭക്ഷണത്തിന്റെ നിറം, മണം, രുചി എന്നിവയിൽ എന്തെങ്കിലും അസ്വാഭാവികത തോന്നിയാൽ ഒരു കാരണവശാലും അത് കഴിക്കരുത്.

• ശരിയായ രീതിയിൽ സൂക്ഷിക്കാത്തതോ കേടായതോ ആയ ഭക്ഷണങ്ങൾ പൂർണ്ണമായി ഒഴിവാക്കുക.

• ഭക്ഷണത്തിന്റെ സുരക്ഷയെക്കുറിച്ച് എവിടെയെങ്കിലും സംശയമുണ്ടെങ്കിൽ അത് ഉപയോഗിക്കാതിരിക്കുക.

ഭക്ഷ്യവിഷബാധയേറ്റാൽ എന്തുചെയ്യണം?

ഭക്ഷണം കഴിച്ചതിന് ശേഷം ഛർദി, വയറിളക്കം, വയറുവേദന തുടങ്ങിയ ലക്ഷണങ്ങൾ അനുഭവപ്പെടുകയാണെങ്കിൽ ഉടൻ തന്നെ വൈദ്യസഹായം തേടണം. വിഷബാധയ്ക്ക് കാരണമായേക്കാവുന്ന ബാക്കി ഭക്ഷണം തിരിച്ചറിയാൻ സഹായിക്കുന്നതിനായി അത് സൂക്ഷിച്ചുവെക്കാനും അധികൃതർ നിർദ്ദേശിച്ചു.

ഭക്ഷ്യസുരക്ഷാ ലംഘനങ്ങൾ റിപ്പോർട്ട് ചെയ്യാം

ഭക്ഷ്യസുരക്ഷയുമായി ബന്ധപ്പെട്ട നിയമലംഘനങ്ങളോ സംശയങ്ങളോ ശ്രദ്ധയിൽപ്പെട്ടാൽ 16000 എന്ന നമ്പറിൽ വിളിച്ച് വിവരം അറിയിക്കാം. ഇത്തരം പരാതികൾ അധികൃതർക്ക് പരിശോധനകൾ കർശനമാക്കാനും പൊതുജനാരോഗ്യം സംരക്ഷിക്കാനും സഹായകരമാകും.
സുരക്ഷിതമായ ഭക്ഷണം തിരഞ്ഞെടുക്കുന്നതിൽ ഓരോ പൗരനും ഉത്തരവാദിത്തമുണ്ടെന്നും, അംഗീകൃത സ്ഥാപനങ്ങളിൽനിന്ന് മാത്രം ഭക്ഷ്യവസ്തുക്കൾ വാങ്ങി കുടുംബത്തിന്റെ ആരോഗ്യം കാത്തുസൂക്ഷിക്കണമെന്നും മന്ത്രാലയം ഓർമ്മിപ്പിച്ചു.