E100 Ethanol Fuel; ഇന്ത്യയുടെ ഇന്ധന വിപ്ലവത്തിൽ വലിയൊരു ചുവടുവെപ്പുമായി കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി രംഗത്തെത്തിയിരിക്കുകയാണ്. E100 ഇന്ധനത്തിനുള്ള (E100 Fuel) പുതിയ മാനദണ്ഡങ്ങൾക്ക് സർക്കാർ പച്ചക്കൊടി കാട്ടിയതോടെ, വാഹനലോകം വലിയൊരു മാറ്റത്തിന് തയ്യാറെടുക്കുകയാണ്. മാരുതി സുസുക്കി, ടൊയോട്ട, എംജി, ഹ്യുണ്ടായ് തുടങ്ങിയ പ്രമുഖ കമ്പനികൾ 100 ശതമാനം എത്തനോളിൽ ഓടുന്ന വാഹനങ്ങൾ പുറത്തിറക്കാനുള്ള ശ്രമങ്ങൾ ഇതിനോടകം ആരംഭിച്ചു കഴിഞ്ഞു. 100 ശതമാനവും എത്തനോൾ അടങ്ങിയ ഇന്ധനമാണ് E100 . ഇതിൽ സാധാരണ പെട്രോളിന്റെ സാന്നിധ്യം ഉണ്ടാകില്ല. കരിമ്പ്, ചോളം, കേടായ ധാന്യങ്ങൾ, കാർഷിക അവശിഷ്ടങ്ങൾ എന്നിവയിൽ നിന്നാണ് എത്തനോൾ ഉൽപ്പാദിപ്പിക്കുന്നത്. നിലവിൽ ഇന്ത്യയിൽ 20 ശതമാനം എത്തനോളും 80 ശതമാനം പെട്രോളും ചേർത്ത E20 ഇന്ധനം ലഭ്യമാണ്. ഇതിന്റെ അടുത്ത ഘട്ടമാണ് പൂർണ്ണമായും എത്തനോളിൽ ഓടുന്ന E100. ഇന്ത്യ ഇന്ന് ഉപയോഗിക്കുന്ന ഇന്ധനത്തിന്റെ ഭൂരിഭാഗവും വിദേശ രാജ്യങ്ങളിൽ നിന്ന് ഇറക്കുമതി ചെയ്യുന്നതാണ്. അന്താരാഷ്ട്ര വിപണിയിലെ വില വ്യതിയാനങ്ങൾ ഇന്ത്യയുടെ സമ്പദ്‌വ്യവസ്ഥയെ ബാധിക്കാറുണ്ട്. E100 വ്യാപകമാകുന്നതോടെ ഇറക്കുമതി കുറയ്ക്കാനും അതുവഴി കോടിക്കണക്കിന് രൂപ ലാഭിക്കാനും സാധിക്കും. കൂടാതെ, ഇത് കർഷകർക്ക് വലിയ ആശ്വാസമാകും. കരിമ്പ്, ചോളം തുടങ്ങിയവയ്ക്ക് കൂടുതൽ ഡിമാൻഡ് വരുന്നതോടെ കർഷകരുടെ വരുമാനം വർദ്ധിക്കും. കഴിഞ്ഞ കുറച്ച് വർഷങ്ങൾക്കിടെ എത്തനോൾ ഉപയോഗത്തിലൂടെ മാത്രം ഒരു ലക്ഷം കോടി രൂപയുടെ വിദേശനാണ്യം ലാഭിക്കാൻ ഇന്ത്യക്ക് സാധിച്ചിട്ടുണ്ടെന്നാണ് കണക്കുകൾ പറയുന്നത്.

സാങ്കേതികമായി പെട്രോളിന് പകരക്കാരനാകാൻ E100-ന് സാധിക്കും. എന്നാൽ നിലവിൽ നമ്മുടെ നിരത്തുകളിലുള്ള ലക്ഷക്കണക്കിന് സാധാരണ പെട്രോൾ വാഹനങ്ങളിൽ ഇത് ഉപയോഗിക്കാൻ കഴിയില്ല. E100 ഇന്ധനത്തിൽ ഓടാൻ പ്രത്യേകം രൂപകൽപ്പന ചെയ്ത ‘ഫ്ലെക്സ്-ഫ്യൂവൽ’ (Flex-fuel) വാഹനങ്ങൾ ആവശ്യമാണ്. അതിനാൽ തന്നെ പെട്രോളും എത്തനോളും വരും വർഷങ്ങളിൽ വിപണിയിൽ ഒന്നിച്ചുണ്ടാകും. എത്തനോളിന്റെ രാസഗുണങ്ങൾ പെട്രോളിൽ നിന്ന് വ്യത്യസ്തമായതിനാൽ എഞ്ചിനിൽ മാറ്റങ്ങൾ വരുത്തേണ്ടതുണ്ട്. മാരുതി സുസുക്കി തങ്ങളുടെ ‘വാഗൺ ആർ’ (WagonR) ഫ്ലെക്സ്-ഫ്യൂവൽ മോഡൽ ഇതിനോടകം അവതരിപ്പിച്ചു കഴിഞ്ഞു. ടൊയോട്ട, എംജി, ഹ്യുണ്ടായ് എന്നിവരും ഈ സാങ്കേതികവിദ്യയിൽ പ്രവർത്തിക്കുന്നുണ്ട്. ഇരുചക്ര വാഹന വിപണിയിൽ ഹീറോ മോട്ടോകോർപ്പ് സ്പ്ലെൻഡർ, എച്ച്എഫ് ഡീലക്സ് എന്നിവയുടെ ഫ്ലെക്സ്-ഫ്യൂവൽ പതിപ്പുകൾ പരീക്ഷിച്ചുകൊണ്ടിരിക്കുകയാണ്.

​ഗുണങ്ങൾ

• ഇറക്കുമതി കുറയ്ക്കാം: വിദേശ എണ്ണയെ ആശ്രയിക്കുന്നത് കുറച്ച് ഇന്ത്യയെ സ്വയംപര്യാപ്തമാക്കാം.
• കർഷകർക്ക് വരുമാനം: കാർഷിക ഉൽപ്പന്നങ്ങൾക്ക് മികച്ച വില ലഭിക്കാൻ ഇത് സഹായിക്കും.
• കുറഞ്ഞ മലിനീകരണം: പെട്രോളിനെ അപേക്ഷിച്ച് എത്തനോൾ കത്തുമ്പോൾ മലിനീകരണം കുറവാണ്.

ദോശങ്ങൾ

• കുറഞ്ഞ മൈലേജ്: പെട്രോളിനെ അപേക്ഷിച്ച് എത്തനോളിന്റെ ഊർജ്ജസാന്ദ്രത (Energy Density) കുറവാണ്. അതായത് ഒരു ലിറ്റർ പെട്രോളിൽ ലഭിക്കുന്ന അത്രയും ദൂരം ഒരു ലിറ്റർ E100-ൽ ലഭിക്കില്ല.
• വാഹനങ്ങളുടെ മാറ്റം: നിലവിലുള്ള വാഹനങ്ങളിൽ ഇത് ഉപയോഗിക്കാൻ കഴിയില്ല എന്നത് ഉപഭോക്താക്കൾക്ക് പുതിയ വാഹനങ്ങൾ വാങ്ങേണ്ട സാഹചര്യം ഉണ്ടാക്കുന്നു.
• ലഭ്യത: രാജ്യത്തുടനീളം E100 ലഭ്യമാക്കുന്നതിന് പുതിയ പമ്പുകളും സംഭരണ സംവിധാനങ്ങളും ഒരുക്കേണ്ടതുണ്ട്. ഇത് വലിയൊരു സാമ്പത്തിക ബാധ്യതയാണ്.

E100 ഇന്ധനം ഇന്ത്യയുടെ ഭാവി മാറ്റാൻ പോകുന്ന ഒന്നാണ്. വെല്ലുവിളികൾ ഉണ്ടെങ്കിലും, പരിസ്ഥിതിക്കും കർഷകർക്കും രാജ്യത്തിന്റെ സമ്പദ്‌വ്യവസ്ഥയ്ക്കും ഇത് നൽകുന്ന ഗുണങ്ങൾ വളരെ വലുതാണ്. വരും വർഷങ്ങളിൽ കൂടുതൽ ഫ്ലെക്സ്-ഫ്യൂവൽ വാഹനങ്ങൾ നിരത്തിലിറങ്ങുന്നതോടെ പെട്രോൾ പമ്പുകളിൽ എത്തനോളിന്റെ സാന്നിധ്യം സജീവമാകും.