Iran US tensions Hormuz; തന്ത്രപ്രധാനമായ ഹോർമുസ് കടലിടുക്കിന്റെ പൂർണ നിയന്ത്രണം തങ്ങളുടെ കൈകളിലാണെന്ന ഇറാന്റെ അവകാശവാദം ശക്തമായി തള്ളി യുഎസ് സെൻട്രൽ കമാൻഡ്. സഖ്യരാജ്യങ്ങളുമായി ചേർന്ന് ഈ അന്താരാഷ്ട്ര സമുദ്രപാതയിലൂടെയുള്ള നിരീക്ഷണവും സുരക്ഷാ പ്രവർത്തനങ്ങളും യുഎസ് നാവികസേന തുടരുകയാണെന്ന് സെന്റ്കോം വ്യക്തമാക്കി. അതിർത്തിയിലേക്ക് അടുക്കുന്ന യുഎസ് യുദ്ധക്കപ്പലുകൾ മുക്കിക്കളയുമെന്ന് ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് നാവികസേനാ കമാൻഡർ നേരത്തെ മുന്നറിയിപ്പ് നൽകിയിരുന്നു. എന്നാൽ, ഇത്തരം ഭീഷണികളെയും കടലിടുക്കിന്മേലുള്ള ഇറാന്റെ ആധിപത്യവാദങ്ങളെയും പൂർണമായി തള്ളിക്കളയുന്ന നിലപാടാണ് യുഎസ് സ്വീകരിച്ചിരിക്കുന്നത്. ആഗോള ഊർജ സുരക്ഷയിൽ നിർണായക പങ്കുവഹിക്കുന്ന ഹോർമുസ് കടലിടുക്കിലൂടെയുള്ള ചരക്കുനീക്കം തടസ്സമില്ലാതെ മുന്നോട്ട് കൊണ്ടുപോകാൻ പ്രതിജ്ഞാബദ്ധമാണെന്ന് യുഎസ് സൈന്യം വ്യക്തമാക്കി. ഗൾഫ് സഖ്യകക്ഷികളുടെ സഹകരണത്തോടെ ഒറ്റ ദിവസം കൊണ്ട് 1.9 കോടി ബാരലിലധികം അസംസ്കൃത എണ്ണ സുരക്ഷിതമായി കടത്തിവിടാൻ സാധിച്ചതായും സെന്റ്കോം അറിയിച്ചു.
ആഗോള വിപണിക്ക് നിർണായക പാത പേർഷ്യൻ ഗൾഫിനെ ഒമാൻ ഉൾക്കടലുമായും അറബിക്കടലുമായും ബന്ധിപ്പിക്കുന്ന ഹോർമുസ് കടലിടുക്ക് ലോകത്തെ ഏറ്റവും പ്രധാനപ്പെട്ട എണ്ണക്കടത്ത് പാതയാണ്. ഗൾഫ് രാജ്യങ്ങളിൽ നിന്നുള്ള ക്രൂഡ് ഓയിൽ കയറ്റുമതിയുടെ ഭൂരിഭാഗവും ഈ ഇടുങ്ങിയ ജലപാതയിലൂടെയാണ് നടക്കുന്നത്. അതിനാൽ, ഇവിടെ ഉണ്ടാകുന്ന നേരിയ സംഘർഷം പോലും ആഗോള എണ്ണവിലയെയും അന്താരാഷ്ട്ര സമ്പദ്‌വ്യവസ്ഥയെയും സാരമായി ബാധിക്കും. ഇറാന്റെ ഭാഗത്തുനിന്നുള്ള ഭീഷണികളെ വകവെക്കാതെ, തങ്ങളുടെ പ്രാദേശിക പങ്കാളികൾക്ക് പിന്തുണ നൽകി സമുദ്രപാതയിലെ ഊർജവിതരണം സുഗമമായി നിലനിർത്തുമെന്ന ഉറച്ച സന്ദേശമാണ് യുഎസ് ഇതിലൂടെ നൽകുന്നത്.