Malayali nurse in Saudi police custody; നാട്ടിൽ നിന്ന് വാർഷികാവധി കഴിഞ്ഞ് ജോലിസ്ഥലത്തേക്ക് മടങ്ങുന്നതിനിടെ ജിദ്ദ കിങ് അബ്ദുൽ അസീസ് അന്താരാഷ്ട്ര വിമാനത്താവളത്തിൽ വെച്ച് കാണാതായ മലയാളി നഴ്സ് സൗദി പൊലീസിന്റെ പിടിയിലെന്ന് ഒടുവിൽ സ്ഥിരീകരണം. വയനാട് സുൽത്താൻ ബത്തേരി അതിർത്തിയിലെ അയ്യങ്കൊല്ലി ആനന്ദ് നിവാസിൽ രവി – ശെൽവി ദമ്പതികളുടെ മകൾ ഫിലോമിനയാണ് (32) ജിദ്ദ പോലീസിന്റെ കസ്റ്റഡിയിലുള്ളത്. ഇവരുടെ യാത്രാ ലഗേജിൽ സൗദിയിൽ കർശന നിരോധനമുള്ള മരുന്നുകൾ കണ്ടെത്തിയതിനെ തുടർന്നാണ് അധികൃതർ നടപടിയെടുത്തതെന്ന് ജിദ്ദയിലെ ഇന്ത്യൻ കോൺസുലേറ്റ് വ്യക്തമാക്കി. റിയാദിലെ കിങ് ഫഹദ് ആശുപത്രിയിൽ കഴിഞ്ഞ മൂന്ന് വർഷമായി സ്റ്റാഫ് നഴ്സായി ജോലി ചെയ്തുവരികയായിരുന്നു ഫിലോമിന. ഒന്നരമാസത്തെ അവധിക്കാലത്തിന് ശേഷം ഈ മാസം പത്തിനാണ് ഇവർ ബെംഗളൂരുവിൽ നിന്നുള്ള വിമാനത്തിൽ ജിദ്ദയിലെത്തിയത്. ജിദ്ദയിൽ നിന്ന് ആഭ്യന്തര കണക്ഷൻ ഫ്ലൈറ്റ് വഴി റിയാദിലേക്ക് മടങ്ങാനായിരുന്നു പദ്ധതി. എന്നാൽ ജിദ്ദയിലെത്തിയ ഉടൻ തന്നെ വിമാനത്താവള സുരക്ഷാ വിഭാഗം ഇവരെ തടഞ്ഞുവെക്കുകയായിരുന്നു. അന്ന് രാത്രി എട്ടരയോടെ ഫിലോമിന തന്റെ പിതാവ് രവിക്കും ഭർത്താവ് ജോണിനും അയച്ച ശബ്ദസന്ദേശമാണ് സംഭവത്തിൽ ആദ്യം പുറത്തുവന്ന സൂചന. തന്നെ എയർപോർട്ട് ഉദ്യോഗസ്ഥർ തടഞ്ഞുവെച്ചിരിക്കുകയാണെന്നും കൈവശമുണ്ടായിരുന്ന ലഗേജുകൾ കൊണ്ടുപോയെന്നും മൊബൈൽ ഫോൺ കൈമാറാൻ ആവശ്യപ്പെടുന്നുണ്ടെന്നുമായിരുന്നു ആ സന്ദേശം. ഇതിന് തൊട്ടുപിന്നാലെ ഫിലോമിനയുടെ ഫോൺ സ്വിച്ച് ഓഫാവുകയും ബന്ധപ്പെടാനുള്ള എല്ലാ വഴികളും അടയുകയും ചെയ്തതോടെ നാട്ടിലുള്ള കുടുംബവും സഹപ്രവർത്തകരും വലിയ ആശങ്കയിലായി. തുടർന്ന് സൗദിയിലെ സാമൂഹിക പ്രവർത്തകരുടെയും ഇന്ത്യൻ എംബസിയുടെയും കോൺസുലേറ്റിന്റെയും നേതൃത്വത്തിൽ നടത്തിയ ഊർജിതമായ അന്വേഷണത്തിലാണ് യുവതി പൊലീസ് കസ്റ്റഡിയിലാണെന്ന വിവരവും ലഗേജിൽ നിരോധിത മരുന്നുകൾ കണ്ടെത്തിയ കാര്യവും വ്യക്തമായത്. സൗദി നിയമപ്രകാരം അതീവ നിയന്ത്രണമുള്ള നാർക്കോട്ടിക് വിഭാഗത്തിലോ പ്രത്യേക അനുമതി ആവശ്യമുള്ള പട്ടികയിലോ ഉൾപ്പെട്ട മരുന്നുകളാണ് പെട്ടിയിലുണ്ടായിരുന്നതെന്നാണ് പ്രാഥമിക സൂചന. വിഷയത്തിൽ ഫിലോമിനയ്ക്ക് ആവശ്യമായ നിയമസഹായം ലഭ്യമാക്കാനും മോചനം സാധ്യമാക്കാനുമുള്ള ശ്രമങ്ങൾ ഇന്ത്യൻ കോൺസുലേറ്റും പ്രവാസി കൂട്ടായ്മകളും ഊർജിതമാക്കിയിട്ടുണ്ട്.